الحمد لله على سلامتك يا عبد الله :)

 

أول حاجه اقول الحمد لله على سلامة أخويه الصغير و خروجه من العملية بالسلامة

أمس دق علينا استاذ اخويه عبد الله في التحفيظ اللي بالمسجد اللي جنبنا

و قالوا الحمد لله على سلامة عبودي و احنا نبغى نزوره مع اصحابه الصغار في التحفيظ

 لانو هذا الشئ راح يؤثر عليه و يخليه يحب التحفيظ..

 

طبعا اخويه الصغير هذا مسوي عمايل مهببه مع التحفيظ هههههه..

 مره يقول يا استاذ بسمع الايات و اروح البيت عشان عندي دوا اخذه

 و مره مدري ايش يقول للاستاذ عشان يرجع البيت بسرعه..

 فماما قالت لهم سووا اللي تبغونو عشان يقعد معاكم لانو هوه مايبغى يجي التحفيظ …

 فاتوقع هذه الزيارة مره تاثر عليه و تخليه يحب التحفيظ…

 

المهم نرجع لموضوعنا..

انا صحيت و القى الناس في البيت ترتب و تزبط اقول ياربي ايش الحكايه..؟

نسيت انهم بيجوننا اليوم

و بس دوبنا خلصنا دق استاذ اخويه عبد الله

و قال انهم خمس دقايق و يكونون عندنا في البيت..

انا طبعا متسنتره على الشباك .. فاضيه ماعندي سالفه هههههه

و قلت مره وحده اعدهم عشان نعرف كم كاسه عصير نسوي…

الا شفت مجموعه اولاد قد اخويه عبودي و اكبر شويه و معاهم ثلاث اساتذه..

بس عشان جنبنا في سور فماني قادره اشوف كويس..

 رحت شفت من مكان ثاني و اللي يكشف على البوابه حقت بيتنا طوالي

و المهم همه داخلين من هنا و بابا عند الباب يستناهم.. بابا بس لف عشان يوريهم الطريق  …

 الا الاستاذ لف يكلم الطلاب الصغار ورافع اصبعه …

 شكله يقولهم ترتبو و لا تسوون رجه و الا حاجه زي كذا

 و انا من فووق بموت من الضحك..

ماكان يدري انو احد يشوفه من فووق و الا اكيد ماكان راح يسوي كذا ههههههههه

 

ما قدرت اكمل عد لاني خفت إنو و انا اعد القاهم

طالعين الدرج فبسرعه عديت اللي شفتهم و طلعت المطبخ

و زودنا عدد الكاسات حقت العصير عن العدد اللي شفته

لانو ماقدرت اعدهم كلهم و بعضهم اطفال صغار فمو باينين من برا البيت

 

المهم نزلت العصير و بابا قالي مايكفون زيدوا عدد الكاسات ..

طلعت ثاني و زدت و نزلت الا اخويه الكبير يقولي ترا الكاسات كمان مايكفون زيدوا…

 طلعت اجيب عصير زياده الا و انا نازله من الدرج شفت ناس طالعين..

 

بجد خساره كان نفسي يطوولون أكثر و ينورون بيتنا

ناس زي كذا الواحد يتشرف بجيتهم و زيارتهم و الله..

اخويه الصغير ماتتصورون لاي درجه مبسووط بهذه الزياره و حتى بابا و اخويه الكبير

و كل واحد في البيت كمان..

 

عن جد حسينا باهتمامهم الصادق

أنا سعيده جدا..

 

و هذا كيك للي مروا على المدونة بمناسبة سلامة أخوي

و احم احم لا تسألوني عن المقادير لوووووول

 

 

 

 

 

 

 

حمااااااااس

 

أمس كان اجتماع عضوات نادي التطوع العربي – نادي جدة

و كان حماااااس بالمرة… يعني بجد حماس أكثر مما كنت متوقعة..

و كان عدد العضوات امم تقريبا 13 بنت من 19 سنة لـ 25

و وحدة بالمتوسطة جات مع أختها تبغى تشترك معانا

 

جلسنا من خمسه و نص العصر إلين 8 و نص المسا

و بجد بجد مره البنات حبوبات و عسولات ووووو كل حاجه..

و يحبون العمل التطوعي بالمره

ووحده عندها ادمان عمل تطوعي ماشاء الله و مشاركة بالنادي من زمان..

 

في البداية جلست كل وحده تعرف عن نفسها و أنا ههههههه

 ماتوصوني اصلا من يوم ماجلست

و انا اتكلم لدرجة انو لمن قالوا عرفينا عن نفسك

قلت لهم خلاص الكل عارف ههههههه

 

و بعد ماخلصنا تعريف عن انفسنا

اتكلمنا عن الاشياء اللي نفسنا إنها تتحسن في النادي

و العضوات اللي اشتركوا في الاعمال السابقة

قالوا انتقاداتهم على بعض الامور اللي حابين انها

 تتحسن عشان يتطور النادي أكثر..

 

اممم و ايش كمان؟!

 

جلست وحده من العضوات و اللي تشتغل بمركز احتياجات خاصة

بتقديم اقتراح للمساعدة فحفلة النجاح اللي راح يعملوها للطلاب..

و كنت مو متحمسه.. الحماااس ..

مررره كان نفسي اروح بس المشكله انو وقتها وقت امتحانات نهائية..

ياللقهر.. يعني بالمرة مافي مجال للروحه

 

بجد زعلت…يعني لا ذا العمل و العمل اللي فات..

 شو هيدا و لك مابينفع هيك…!

 

بس يالله في لقاءات جايه أكثر كمان

و باذن الله أقدر أشارك فيها و اعوض عن غيابي بالمرات اللي فاتو..

 

يالله فتكو بعافيه

 

الله يستر

 

أمس كان يوم سئ إلى حد ما

دقت عليه وحده من صحباتي و قالت لي على أخبار و درجات ماتحمس أبداً..

و بجد كان دش مزبوووط للأخبار السيئة لدرجة إني حسيت إنو جاني هبوط و هيه تكلمني..

ما أبغى أتفشل و آخذ مواد ذا الترم..

نفسي أتخرج و أنا ماعليه و لا ماده…

 بس مع درجات زي كذا الوضع مايطمن بجد…!

 

ع العموم أنا قررت انو من يوم ما أخلصت اختبار السبت و الأحد هذا

راح اعمل لي جدول مذاكرة عشان الإمتحانات النهائية

لانو خلاااااص كفايه إهمال أكثر من كذا..

 

و الله مدري إيش فيني أحس على آخر ترم بطاريتي خلصت و لازم لي شحن ثاني..

باذن الله راح أذاكر ثلاث أو أربع أضعاف المذاكرة اللي ذاكرتها في اختبارات نص الترم…

أخاف لو قلت أكثر من كذا أنتحر لوووول

 

و أبشركم كمان نزل جدول النهائي و من كثر عدد موادنا نبدأ قبل كل الأقسام الثانية ..

لا و أزيدكم من الشعر بيت، نخلص كمان آخر ناس..

 

الله يعين ….!

 لازم أشد حيلي بقوة إذا كنت ناويه أتخرج ذا الترم…

و هذا اللي راح يصير بإذن الله

 

 

العمر حين تسقط أوراقه، لن تعود مرة أخرى

 

اضغط على الصورة لتكبيرها

 

 

عندما تُـمنح الثقـــة…!

 

قبل كم يوم كنت أتفرج على أخبار إي بي سي على MBC 4 …

 جيت على آخر التقرير اللي كانوا عاملينه و اللي يتكلم عن شركة أجنبية ..

لا حظت هذه الشركة إنو في بعض النساء و ياللي عندهم أطفال بيبيهات صغار يكون تفكيرهم مشغول بأطفالهم وقت العمل.. و شافوا إنو هذا يؤثر على الشركة سلبيا..

 فقاموا ايش عملوا…؟!

سمحوا لهم يجيبوا أطفالهم الرضع لمكان العمل.. و مصورين مقر العمل و كيف وحدة داخلة مع البيبي حقها و تجلسوا على المشاية و الثانية جايبه له العربية و منومه ولدها الصغير فيه.. و تقعد تشتغل و لمن يصحى تجلسه فحضنها و تكمل شغلها و هيه مرتاحه و ماهي شايله هم أحد يمسك لها طفلها و الا تبغى تخلص شغلها أي كلام عشان تلحق ترجع البيت بسرعه لابنها الصغير.. دحين بالنسبة لها فعادي ماعليها حتى لو تقعد فترة أطول في العمل لان مافي شئ شاغل فكرها.. مو زي لو مخليه أبنها الصغير مع وحده من الجيران و الا شئ..

و جايبين كيف الموظفات مرة فرحانين بهذا الشئ ياللي عملتو الشركة…

و كيف هذا الشئ شجعهم على العمل أكثر..

 

أذكر في مرة كمان كنت أتفرج على برنامج 20/20 إذا ماخاب ظني.. لانو شفته من فترة مو قصيرة..

المهم كانوا بيتكلموا عن شركة أجنبية و هذه الشركة فكرت بطريقة عشان تزيد الأرباح و تشعل الحماسة و حب العمل في نفوس موظفيها.. فعشان يعملوا كذا نزلوا قرار أنو إشتغل متى ماحبيت و بأي مكان… يعني مو لازم تجي لمقر العمل بس أهم حاجه إنو تخلص شغلك.. و جايبين الرئيس في الشركة يتكلم مع اللي عامل اللقاء و يتجولون فنفس الوقت بين المكاتب حقت الموظفين..

 المكاتب فاضية و مرررره هادية،،،مافيها أحد….!

و بعد كذا عملوا لقاءات مع نفس الموظفين .. و حدة تقول إنها تحب تشتغل في الليل و ماتحب شغل النهار .. فتقعد سهرانه في الليل تشتغل و تنفذ الأشياء اللي عليها إنها تخلصها.. و تقول إنها مره مبسوطة لمن تسمع التعليقات لمن يشوف المرسل وقت إرسال الرساله و يقولون لها يعني إنو واووو سهرانه لساعة متأخرة تسووين أشغالك..

و جايبين و احد ثاتي كبير شوية بالسن بس مو مره.. يعني يمكن في الخمسين.. يقول هذا الموظف إنو من يوم مانزل هذا القرار و هوه صحته صايرة أحسن…لانو صار يقوم الصباح بدري و بدل مايروح الدوام يقوم يمشي و يعمل رياضة و بعدها يفطر و بعد مايرتاح يعمل أشغاله و هوه مرتاح و مروق..

كلموا موظفين كثيرين و لمن حسبوا بعد كذا عدد ساعات عمل الموظفين لقيوا إنهم يعملوا بعدد ساعات أكثر من لو كانوا يداوموا بمقر العمل.. لانهم دحين عادي يشتغلوا بأي وقت و مايهم كم ساعة اشتغلت بس أهم شئ تخلص اللي عليك .. مو مربوطين بساعات دوام متى ماخلص الدوام يطلعون ..

فهذا اللي يقدم البرنامج يقول لهم إنو هذه الشركة مخليتكم بهذه الطريقة تشتغلون “فل تايم جووب”.. بس الموظفين يقولون أنو همه مبسوطين بالمره على الثقة اللي معطيتهم إياها الإدارة و عشان كذا همه يحاولوا إنهم يبذلون قصارى جهدهم عشان يبينون  إنهم قد هذه الثقة..

 

يعجبني التطور في التفكير اللي تتميز فيه بعض الشركات..

شركات تبتعد عن الروتينية

و تحاول تعمل حاجات جديدة تجذب و تحبب موظفيها على العمل أكثر..

 شركات تركز على أهدافها أكثر….!

عقبال الشركات السعودية و العربية

 

 

* يا قـاطعـ ليـشـ مـا تسـألـ *

 

كنت أتمشى فأحد المنتديات

و لقيت نشيد يهبببببل بالمرررره ..

 كلماته حلوة و الصوت حق المنشد بالمرره حمااااس..

بس ترا النشيد قصير شوية لووول

 

كلماتهـ

 

يا قاطع ليشــ ما تسـأل

عن أصحابك و أحبابكْـ

 

بربك قولــ ما تخجـل

و أنا واقفْ على بابـكـ

 

أناظر يا متى تـوصـل

و نايف أقرب أقرابـكْـ

 

و دربكْ مهما كانــ اطـول

أقول الشـوق لي جابـكـ

 

للتحميل اضغط هنا  

 

مكافأة للزواج من (الثـانيــة)….

قبل شوية قرأت خبر بموقع جريدة المدينة عن قبيلة بجنوب الطائف،،

 هذه القبيلة عاملة تشجيع و مساهمة و مساعدة مالية للي بيتزوجون للمرة الثانية فقط..

و ذلك على حسب قولهم ” قضاءً على العنوسة ” …

و قدموا هذا المبلغ ألين دحين لـ 3 أشخاص تزوجوا على زوجاتهم ..

 

يعني اوكي ماقلنا حاجة؛

ساعدوا على قضاء العنوسة بس مو كذا ..

 الشباب اللي اصلاً لسه ما اتزوجوا و يبغوا يتزوجوا مليانين بالبلد

 فإنتوا ممكن تتبرعون بهذه المبالغ لجمعية مساعدة الشباب على الزواج..

 و أو ممكن تساعدوا بعض الأشخاص بعينهم إذا تبغوا..

لانو في بعضهم يبغى يتزوج و يعف نفسه بس مو قادر و حالته المادية حاله

و الا يمكن دوبوا ماصدق لقى وظيفة و راتبه على قده

 و يبغاله عشان يجمع عشرين الف وووقت…الخ

 

 فيعني اللي ابغى اقولو بس انو في أولويات ممكن تعملوها أول

و بعدين تزوجوا اللي اصلا متزوجين.. 

 

و هذا مصدر الخبر

 http://www.al-madina.com/node/5119

 

 

 

يارب مايتأجل

 

بكرة عندي اجتماع مع عضوات نادي جدة التطوعي

و مررررررة مرررة متحمسة لانو هذا اول اجتماع احضره معاهم..

 كانوا عاملين بازار قبل فترة بالصيرفي ميجا مول بس ما قدرت اروح

 لانو كانت عندي زحمة اختبارات و اعتذرت..

فبالمرة يعني متحمسة دحين عشان اقابل العضوات اللي معانا و اعرفهم عن قرب..

 

بس تقول المسؤولة عن النادي انو في احتمال يتغير الموعد للاربعاء

عشان في بعض العضوات مايقدرون يجون بكرة..

و المشكلة اني حاجزة السيارة على بكرة من قبل كم يوم

عشان محد في البيت يقول بيطلع و الا بيروح مكان … الخ..

 

فلو اتاجلت راح اتورط مزبوووط….!

بس يارب ماياجلونها و يخلونها بكرة ..

 خاصة انو انا كمان ماراح اروح الكلية فيعني راح اكون فايقة و رايقة

مو زي لو كان يوم الاربعاء لانو احتمال يكون عندي اختبار 

 

( بالمناسبة ليه اكثر من شهرين و انا اختبر اختبارات نص الترم

 و الين دحين ماخلصت مع انو النهائي باقي عليه اسبوعين)

 

بس يالله الواحد مايعرف وين الأحسن و الأخـْير ..

 

بالمناسبة…!

 أي احد يبغى يسجل معانا بملتقى التطوع العربي

فممكن يدخل يسجل معانا على رابط الموقع اللي هوه

http://www.arabvolunteering.org/corner/

 

 

تطري على بالي الفرقا…

 

http://www.y1y1.com/u/uploads1/d374530bc6.jpg

 

و تبقى الذكريات…!

 

http://www.arb-up.com/files/arb-up-2008-1/hwz94647.jpg